免稅店DFS創辦人麥禮賢（Robert W. Miller）身家數以十億計，噚日宣佈捐一億港元畀亞洲協會香港中心，扶植本地藝術發展，仲係本地藝術界歷來最高金額嘅個人單一捐贈項目。
中心會址中嘅亞洲協會藝術館，仲會以麥禮賢太太之名，重新命名為Chantal Miller Gallery。麥禮賢話，噚日正是同太太結婚49周年紀念，收到大禮嘅Mrs Miller一聽即報以甜美笑容。
Miller04年同12年分別捐過幾百萬畀亞洲協會香港中心。館方呢排為中國當代藝術家徐冰辦展覽，徐冰仲送咗幅「英文方塊字書法」畀Chantal Miller㖭。