一間餐廳，最重要當然係廚師。William透露，餐廳總廚將會由原本喺英國分店任職嘅廚師出任，佢將會移居香港長駐餐廳，兩位副廚就係香港人，將會派去英國分店接受大約兩個月嘅訓練。
Jamie's Italian請廚師嘅過程都幾特別，面試當日，應徵者要喺五款餐廳菜式中，挑選其中一款即席烹調，畀負責人試食，仲有攝錄機拍低整個過程。
William話，現已聘請8名員工。餐廳正進行第二期招募，共聘請94人，包括侍應、酒保等職位。Jamie本人又拍片放上網廣邀香港人加入，應徵者不單止要性格樂觀，更要積極同充滿活力，有興趣嘅仁兄可以透過網站申請，講唔定可以去英國接受Jamie特訓。
總經理鄭慧儀家陣就喺英國分店受訓嘞，佢要喺六星期內熟習店內所有位置工作。