為咗幫父親圓老闆夢，前香港劍擊代表顏冠一（圖），花咗年幾時間，終於搵到合適嘅食肆，噚日喺牛頭角得寶商場開張，千幾呎大嘅烏冬店擠滿體壇好友，包括葉姵延、蔡曉慧、陳敬然、李致和同張藝馨等。兩年前退役嘅阿一，都有唔少劍擊俱樂部畀高薪佢教劍，但阿一希望圓患癌病父親嘅開舖心願：「我爺爺以前都係開舖嘅，到我爸爸時，佢為咗養大我同哥哥兩兄弟，冇時間創業，後來仲生癌，好在𠵱家喺美國康復中，佢知我開到舖頭已經好開心，我最想佢返嚟香港時，我可以親手煮碗烏冬佢食。」
阿一新店係從一位uncle手中買入特許經營權，大約用咗7位數字資金，仲用咗幾個月時間學煮烏冬；咁孝順，大家得閒去幫襯吓啦！