古天樂舊愛黃𨥈瑩大前日出席佛誕活動，現年38歲的她依然省鏡零走樣，不過就以已離開娛樂圈為由拒絕受訪，不知是否怕重提舊情人古仔呢！昨日古仔到銅鑼灣出席鞋履品牌剪綵，同樣封口拒談舊愛黃𨥈瑩，兩人分手多年，果然舊夢不須記！
昨午大會安排古仔駕駛法拉利架勢登場，穿上贊助商送贈銀色閃鞋的他說：「十幾年冇揸車，打從由無綫年代開始，覺得香港又塞車路又窄，有時太攰怕瞌眼瞓，所以好耐冇揸車。」記者笑他浪費了家中的靚車，古仔說：「通常買家庭車代步冇跑車，屋企人用多。」問多年沒揸車有否緊張？他說：「冇，拍戲都有揸，只係私人時間少，自己享受自駕遊樂趣，喺加拿大、法國旅行有揸車。」
內地建63所學校
此外，日前爾冬陞在微博爆古仔在內地捐建61所學校，其後粉絲補充指應是63所，古仔表示唔回應，問是否想做隱形慈善家？他說：「唔講，不如講母親節。」記者謂不如講佛誕？醒目的古仔知記者想問黃𨥈瑩，他笑說：「我知你哋問乜。」記者直問黃𨥈瑩出席佛誕活動被讚保養得宜？古仔封嘴：「唔回應。」再問有冇聯絡？他繼續說：「唔回應，講母親節啦，預先訂咗枱食飯，年年媽咪自己買禮物，我再畀番錢，今年都係買手袋。」
採訪、攝影：卓寶花