逢政府推動政改期間，都會成為政府重點拉票對象的衞生服務界李國麟（Joe），噚日身先士卒走入中聯辦，同中聯辦主任張曉明討論政改整整粒半鐘。
自嘲普通話「太普通」
首次步入中聯辦嘅阿Joe會前笑言，自己若然「有入無出」，最多報警求助。最終阿Joe完好無缺，出嚟見記者，即話自己上咗兩條電梯，就直入一樓一間房，全程除咗張曉明，就只有兩名張嘅副手列席，其間無保安要搜佢身或者進行安檢。
阿Joe就話由於自己普通話「太普通」，所以問得最多的問題係「你（張曉明）明唔明我講乜呀？」張則自言識聽。
當阿Joe講英文，唔識將engagement譯做中文時，張主任副手就幫手繙譯。臨尾張主任玩食字，指今年係「甲午」年，順勢講段中國過去如何被日本欺負的「甲午戰爭」歷史，先送阿Joe離開。
張主任唔知係咪響應元秋早前勸港人向同胞借出廁所嘅「包容」呼籲，噚日除咗準備兩杯龍井茶畀阿Joe飲，又「以身作則」，先後兩次借出廁所畀阿Joe，算係「釋出善意」。Joe哥出名係疑似泛民無間道，難怪得到西環格外包容。