又一個聯賽產生咗冠軍。周三兩場法甲，由於次席嘅摩納哥喺頭場失分1:1和咗甘岡，令到榜首嘅巴黎聖日耳門（PSG）喺主場對雷恩場比賽未開波就已經確定夠分封王，自08年里昂之後首支球隊成功衞冕法甲，賽後教練白蘭斯亦同球隊續約至2016年6月。場波PSG先開紀錄，但之後被雷恩連入兩球輸1:2。伊巴謙莫域（左）喺下半場復出但冇波入，維持比數輸波但無傷大雅。