為咗畀旅客解決人有三急，慈悲為懷嘅民建聯元秋蔣麗芸早前建議，全港食肆應開放洗手間，向旅客大開方「便」之門，飲食界立法會議員張宇人聲稱，其實全港食肆都開放洗手間，任何人走入食肆，都可以借廁一用：「唔使佢蔣麗芸建議。」但唔少食肆都經常貼張紙出嚟，話「洗手間恕不外借」，張宇人話，唔少食肆只係擔心有人會整到個廁所污糟邋遢，搞到衞生督察嚟檢查時，食肆要被扣分兼釘牌，所以貼張紙出嚟減少廁所外借次數。佢批評，地區上公廁都唔多個，政府一味依賴食肆肩負「借廁所」嘅社會責任，但同時又不斷打擊食肆嘅生存空間。提出建議嘅元秋就話，依佢理解，唔係所有食肆都會開放廁所，似乎認為張宇人所講嘅有商榷餘地。