喺全港最貴呎租嘅銅鑼灣景隆街2號地下A2舖隔籬個C號舖，現由手錶店租用，但已貼滿「租約期滿」招紙，錶店老闆施先生接受電話訪問時透露，業主原本諗住將3間（C、D、E號）舖打通，租畀國際品牌，但𠵱家可能又分拆出租嘞，暗示業主願望落空。
手錶舖實用350方呎，現時叫租38萬元，施先生以短期租約租用，冇透露租金，但前租客藥房月租35萬元，現叫38萬元，加得唔多。
施先生指，呢條街主要靠自由行旅客，但過去一年，佢間手錶店嘅內地客生意越來越少，粗略估計，對比舊年同期起碼少兩成，家陣月租叫38萬元，「老實講，一定唔平，家陣同業主傾緊，睇下有冇得平啲，繼續做落去」。
喺佢間舖旁邊已有一間吉舖，再隔籬嘅時裝店好似都就快租約期滿喇。