現年72歲嘅洪金梅（祥嫂）噚日同好友黃夏蕙出席喺尖沙嘴舉行嘅母親節活動，被問到星期日母親節仔女點同佢慶祝時，祥嫂話仔女已經約咗食飯，不過就未收到禮物，但佢就好抵死咁補充：「我好多嘢都有咯喎，係爭啲愛心囉。」佢話自己賢妻有餘良母就爭少少，祥嫂話：「我照顧老公健康及增長財富係我所長。」講到同一班仔女相處之道，祥嫂話要重新學習，亦唔使仔女特登就晒佢，因為咁樣有損母親嘅尊嚴，亦搞到大家關係變成外人咁。佢又爆祥哥新馬師曾係爛賭仔，作為第四任老婆嘅祥嫂當日長時間掛住照顧老公，佢話：「但針冇兩頭利，所以忽略咗班仔女。」
有人傾慕自己
講到有冇追求者，祥嫂自言知道有傾慕自己嘅人，但就已經冇呢個心，亦冇必要開展一段新戀情，祥嫂話：「祥哥唔喺度已經17年，我個心都好寧靜，男歡女愛好煩，愛情嘅嘢好飄渺，好令人煩惱，純真嘅友誼就可貴，愛情呢啲全部靠口講，唔實質，寧願寄情其他嘢，信自己仲穩陣，而且可以一夫到尾喺一種榮耀。」
撰文：馮仁昭