內地有啲政策確令人啼笑皆非，想當年一套《步步驚心》掀起內地「穿越劇」熱潮。點知其後廣電總局認為穿越時空呢類題材太濫；亦有指係因為內地有「天才」為學主角穿越時空，刻意為自己「製造」意外，所以當局落咗禁播令。結果令套劇續集焗剪走所有穿越情節，劇情不倫不類，令唔少劇迷失望。如果下禁令原因係太濫，根本當觀眾真係見悶，到時就自然冇人拍，犯不着出動有形之手；如原因是防止出意外，咁唔少人炒A股、滬港通都出事喇，咁摺埋A股吖笨？好多時政府就係唔識對症下藥。香港黃金周假期期間自由行人數跌1.6%，令一眾零售股下跌，但相信唔少港人內心暗喜。近年自由行問題加深中港矛盾，條街太多人當然係原因之一，但講到尾都係源於港府冇為自由行設限，而香港人就樂此不疲的依賴自由行賺快錢。十年過去，最終成條西洋菜南街由藥房、金舖、電器舖推高租金。香港人失去原來生活，條街又逼，唔躁就假。
自由行設限當然要，但歸根究柢，港府首要應該打破香港旅遊業單一嘅局面，兩手準備。就算有日內地經濟資金鏈真係斷纜，香港都未至於要陪葬。作為商務及經濟發展局局長蘇錦樑，更應該排第一做嘢幫香港轉型，而非叫人「包容」、「等多班車」。否則他日香港真係被內地累死，到時想搵人包容蘇局長都難。
Fifi
本欄逢周二、四刊出