五一黃金周內地旅客來港數字減，零售業首當其衝，店舖業主都開始感受陣陣寒風。銅鑼灣景隆街2號A2舖嘅找換店上月被加租44%續租，蟬聯本港最貴呎租舖位，點知一個月唔夠，隔籬B舖獲新租客承租，加租幅度得6%，附近陸續有吉舖。唔知呢間找換店嘅東主會否揼心口，呻租早咗，租貴咗呢?
國際品牌搵舖審慎咗
景隆街2號拆開A至E共5個舖，09年由西貢全記海鮮菜館老闆吳偉麟等人買入，A2舖找換店，實用30方呎，上月續租，由18萬加到26萬元，呎租約8,667元，呎租計貴絕全港。
吳偉麟接受電話訪問時承認呢個舖新近續租，話有另一間找換店吼實呢個舖，提出以月租26萬元租用，「人哋畀幾多，我梗係問下原先個租客，話晒租咗咁耐，冇理由聲都唔聲租畀第二個」，結果對方願意畀番咁多續租。
對於隔籬B舖本周一只加租6%租畀新客，舖王就加租44%，找換店老闆咪即係笨咗?吳偉麟即刻緊張回應：「梗係唔算啦，佢唔租，有另一個租客用呢個價錢。」不過佢都睇淡舖位市道，指國際品牌搵舖較謹慎，「唔似早兩年咁，合埋眼，有位就得」。
租出B舖後，景隆街2號仲有1個吉舖，前租客係九龍表行，旁邊兩個舖亦快將租約期滿。吳偉麟坦言，租客要求平啲租番，佢考慮緊，想睇下有冇大品牌睇中，否則都係跟市價續租，無意大幅加租。
李華華
mailto:[email protected]