由杜汶澤、古天樂和日本AV女優沖田杏梨等主演的港片《3D豪情》，截至前日在港上映34日，票房累計約為1,600萬。同時電影公司已將遊戲版權賣給一間遊戲商，開發成免費網上手機遊戲。不過當遊戲申請在蘋果的App Store上架時，卻被以不同原因拒絕，遊戲商估計可能因蘋果審批基地由美國移往內地，推測今次亦可能跟近日被內地封殺的阿澤有關。
「已過咗淫審處」
《3D豪情》遊戲開發商Sillyfish Digital Entertainment Limited的項目主任Johnny昨日接受電話訪問時，認為蘋果對此款遊戲的處理手法跟過往有很大出入，當中有被河蟹之嫌，他說：「我哋遊戲嘅題材以3D豪情女優作為遊戲入面嘅主角，第一次申請嘅時候，蘋果話色情唔畀上架，經我哋律師寫咗個回應之後，佢哋又用第二個理由拒絕，仲罕有咁冇白紙黑字書信來往，而係極稀有咁致電解釋遊戲被禁嘅原因。理由係遊戲名稱或者內容均含敏感題材、人物或色情內容。但係我哋已經過咗香港淫審處，仲可以喺便利店賣遊戲卡，所以點會色情？」
遊戲商覺得是蘋果出於政治考慮，據他們所知蘋果將中文內容的遊戲及應用程式審批基地，由美國加州轉移到上海，相信是方便他們「優化」一些不符合內地的程式，同時亦估計跟阿澤早前反服貿等言論導致今次封殺事件，不過亦可能跟遊戲內容涉及色情有關。至於近日被廣告商及片商劃清界線的杜汶澤，昨表示不作回應。
另外，一直緊咬着杜汶澤不放的「愛國藝人」溫兆倫，接受傳媒訪問時表示原本可以寬恕阿澤一次，給與正能量，可惜他「死性不改」就要受到「一定的懲罰」。
採訪：李森