北京舊年開咗法國老佛爺百貨（I.T（999）有一半股權）；上海去年亦有來自米蘭的10 Corso Como；甚至連卡佛前幾日都開舖開到去成都（又係在「自己人」九倉（004）旗下IFS商場內），你話內地市場幾咁「國際化」？但有業內人士話，這些高檔又有品味的時尚百貨店，開業以來都是門可羅雀，裝修雖然美輪美奐，商品採購有心機，但卻似乎唔係太多人識欣賞。
朋友說，中國的確有好多有錢人，粗略可分為三大類：1.暴發戶，這些人一擲千金，但通常只會幫襯大牌子，最好有明顯logo，着出來立即可被人認到嗰隻；2.企業家：這些人白手興家，靠自己努力發達，但就因為咁會比較慳家，買嘢講求「性價比」；3.係真正有錢又懂得生活品味的人，為數不多，而且真係咁有taste的話，佢哋會選擇去歐洲shopping，順道在米蘭食早餐飲咖啡，又怎會幫襯身處內地的外國百貨店？
其實這些國際百貨店最強的地方，是他們對商品的洞察能力，可以揀到啲人哋冇而又符合市場和潮流的產品，但前提是經營者先要對本土市場有足夠了解，同埋要有耐性，去等中國大部份的消費者慢慢進步。前景可能有嘅，不過唔知幾時才會實現。
海迪