憑超小巧身形加全片幅的勁靚畫質，Sony α7同α7R都得到相當大的市場回響，身邊唔少朋友都忍唔住入手。隔了一段短時間，α7系又有新成員α7S出場，基本上跟傳聞中的一樣，外形近乎完全沒改變，像素則由α7R的3,640萬像素及α7的2,430萬像素，下調至1,220萬像素，不過就同屬全片幅，試相畫質依然高水準，全片幅始終有一定優勢。而ISO更進一步由α7R和α7最高的25600，提升至α7s的最高409600，最低亦可降至ISO 50。現場試過在黑盒中試拍，ISO去到409600當然有明顯noise，但仍在可用範圍，ISO 25600影像更是頗滑，而暗黑下對焦亦算爽快，提升了不少攝影彈性。新機當然還少不了盛傳的4K拍攝，而大家最關心的價錢和發售日期，對唔住，官方未有公佈，有興趣的要等下喇。
拍4K 需加配器材
α7s的傳聞都傳咗一段時間，新機跟消息一樣以4K拍攝為主打，號稱是世界首部採用全片幅影像感測器來拍攝4K影片的相機，能在不經裁剪或隔線讀取和處理每個像素，以HDMI直出QFHD 3,840 x 2,160格式至外置的專業4K攝錄機。嗱，留意喇，呢個係重點呀，其實α7S並唔可以只靠自己拍4K，而係要另加一部機先做到，而現場就輕輕咁介紹並展出了一部由ATOMOS推出的攝錄機，外形像一部厚身平板，由α7S輸出的4K影像就可以由它來錄影，可惜現場未有得試，此機暫時亦未有推出日期，預計大概賣一萬六千蚊。而α7S本身只係可以拍一般的全高清1,920 x 1,080影片，但可選擇50p、50i、25p、60p、60i、30p及24p等多款幀率，方便專業用家。新機更可切換至APS-C模式，拍攝100或120fps，1,280 x 720p的慢動作影片。另外α7s亦是α系相機中首部加入XAVCS錄製格式，能以50Mbps儲存，提升質素。
