近期忙於搞政改嘅政務司司長林鄭月娥，噚日抽空出席醫院管理局一年一度研討大會做主禮嘉賓。佢話，可能大家未必記得，好多年前佢代表庫務局，做過醫管董事局成員。醫管局當然想得到多些政府撥款，但公共資源有限，佢就係負責幫政府睇住醫管局盤數，令自己變成不受歡迎成員。
林鄭嘅自嘲引起全場大笑，但開幕儀式完咗後，佢無回應前日佔領中環商討日三嘅投票結果就走咗。八方見佢近期已經比最瘦嘅時候肥番少少。主人家醫管局行政總裁梁栢賢，以一貫輕鬆手法，介紹醫管局嘅服務，仲借近排大熱韓劇《來自星星的你》過橋，形容自己係「來自HA的我」，努力維持高質素服務。