從《射鵰英雄傳》的靖哥哥，到《十月初五的月光》的初哥哥，至去年《衝上雲霄2》的Cool魔，張智霖入行廿年有多，哥哥變成魔！身邊拍檔由朱茵換上佘詩曼再換上陳法拉的歷代女神，他的一張kidult帥氣童顏，卻歲月不留痕，或許全因他心存一顆未泯的童心。
撰文及造型：趙潔恆
攝影：郭賢興
化妝：Hetty Kwong
髮型：Vic Kwan of ii Hair
張智霖(Chilam)去年憑「Cool魔」一角，再爬上事業高峯，之後hit中大眾集體回憶，翻唱《歲月如歌》，眼下正籌備7月舉行的演唱會，再去盡些，準備趕拍《衝上雲霄》電影版。密集檔期中的訪問在上海舉行，Chilam在酒店超速換裝，以不敗的型男造型交出電眼表情。
Kidult玩意
42歲張智霖名副其實是一個kidult，他對大男孩的玩意──跑車、手錶、美酒也染指，年前又跟好友郭富城合夥湊份做馬主，玩得招積。講起玩物，也有一時喪志的經驗：「鍾意啲罕見嘢，會喺網上bid衫、bid錶同埋bid酒。最瘋狂嗰次，係喺網上bid咗支酒，係1971年威士忌，望落好似好抵，先至港幣四千幾，因為照計都要過萬蚊，於是就即刻㩒buy now，點知送到嚟，係一支細酒辦，得一啖，就學識咗網上買嘢要睇清楚啲。」
至於車與錶，兩者鍾愛程度不相伯仲，「錶就容易收藏啲，車就買來賣去，後來發現搵唔到位泊，好氣餒，或者泊咗喺朋友度，幾個月都唔見一次。不過，其實有時錶擁有咗又唔係擁有喎，因為我又唔會日日戴唔同嘅錶，有時都唔發覺原來自己買過呢隻錶，有時買嘢都係一時嘅激情嚟嘅啫。」
大男孩愛玩，但當起爸爸，對着自己的魔童兒子張慕童，卻絕對認真。「其實我係潛意識去成長，又唔係好刻意要去樹立榜樣，始終唔想下一代傳承咗一啲明顯嘅缺點，所以會減少去做啲壞習慣，之前有食煙，唔覺唔覺就戒咗。對小朋友，有好多事都可以輕鬆處理，當然去到一啲構成危險好似玩火，就要嚴厲認真。好多事不可以一條線一味話唔得，要分輕重囉。」
開心減壓
在訪問之前，他剛剛舉行了演唱會的記者會，會上當眾脫衫，以為他會如韓星一樣大賣結實胸肌，卻原來是搞笑展示一排道具肌肉，逗得全場夾雜噓聲的大笑。Chilam將耍帥與搞笑同步進行，不怕破壞酷男形象。「開心啲吖嘛！今次演唱會最想玩嘅，係做一個variety show(綜藝節目)，我覺得好多時大家將variety show睇成貶義係唔公平嘅，有時曲高真係會和寡，反而一個開心嘅演唱會，係𠵱家香港人更加需要嘅。」
Chilam把演唱會看作一場玩樂表演，要引人發笑更要費煞思量，「因為香港觀眾或者市民，都喺度經歷緊一個好瘋狂嘅年代，大家都好壓抑、好大壓力。如果大家可以喺演唱會入面，得到一份輕鬆，我覺得好重要。」
想做女人
貼市很重要，Chilam早前緊貼市況請來一班高登女神拍MV，一首《你是如此的難以忘記》吸納過百萬點擊，乘勝追擊製造網絡熱話。「Cool魔」成功，在電影版延續魔勢，除了「Sam哥」吳鎮宇之外，即將與另一以cool掛帥的古天樂交鋒，他未有感到威脅，「其實佢私底下又唔係咁cool嘅，未收到劇本，都未知佢嘅角色係點。」還想演甚麼角色？男神已有鬼主意：「我幾想反串做女人，𠵱家啲特技化妝、CG咁犀利，應該做到。」
人魚線是陪襯
時下保養得宜的成熟女星被奉為美魔女，而一批年過50的型男也順理成章歸為美魔男，42歲的Chilam還未夠秤當美魔男，但也被譽為「不老男神」、「童顏帥爸」，「最緊要就係大家茶餘飯後都有啲嘢去講吓，開心吓喳嘛，唔需要太認真，係供人娛樂嘅點子，係我哋嘅份內事。」「八嚿腹肌都齊全，但係脂肪遮住咗就睇唔到。操練係重要嘅，最重要係個人狀態，人魚線呢啲都只不過係陪襯嚟。」
型佬進化
入行23年的張智霖，以歌手身份出道走鄰家男孩路線，去年由大哥哥進化成Cool魔，俊臉多年不變還多了分型味，被奉為不老男神。
1991年《現代愛情故事》
夥拍許秋怡合唱出道，他勇奪新人獎，歌曲更成為經典K歌。
1994年《射鵰英雄傳》
23歲一臉稚氣拍攝劇集，飾演敦厚郭靖。
2000年《十月初五的月光》
飾演「初哥哥」文初，賺人熱淚的角色，深入人心。
2013年《衝上雲霄II》
演機師「Cool魔」顧夏陽，再度爆紅，獲得全民選出的「最受歡迎電視男角色」。
更多精采時尚內容，盡在 http://add.appledaily.com。