嘉華國際（173）與銀娛（027）主席呂志和除咗鍾意做生意，閒時都好鍾意聽歌，流行曲、古典音樂、粵曲同歌劇樣樣都啱，佢大女、嘉華執董呂慧瑜（Paddy）細細個已經受到薰陶，培養咗對歌劇好濃厚嘅興趣。
兩父女對歌劇都咁有興趣，嘉華順理成章喺今年贊助由香港歌劇院與「法國五月」合力炮製、一共上演3場嘅著名經典歌劇《浮士德》。舊年佢哋都有贊助「法國五月」嘅歌劇節目《荷夫曼的故事》。
呂氏父女過去都好落力推廣本港歌劇發展，好似Paddy喺2003年就出錢出力創辦香港歌劇院，舊年嘉華又再捐多1,000萬元培育本地歌劇人才。呂志和喺澳門嘅賭場渡假村澳門銀河，已經計劃咗會喺第三期興建劇院，實行將歌劇帶埋去澳門推廣㖭。