高鐵延工，運房局局長張炳良搞到焦頭爛額，八方不期然諗起，09年萬民包圍立法會，高呼「反高鐵停撥款」之際，張炳良嘅「前任」，時任運房局局長鄭汝樺，懶理議會外抗議嘅菜園村村民同後生仔，冷對議事堂內對669億天價高鐵撥款提出唔少合理質疑嘅議員，喺建制派護航下，強行打劫納稅人，通過撥款。
鄭汝樺之後退休，轉趨低調。勢估唔到，喺呢個高鐵延工風暴再起之時，佢又重現江湖喎。佢最近幫有宗教背景嘅組織「愛爸媽．愛我家」運動拍咗段宣傳片，話BB嘅第一句說話會係爸爸或者媽媽，父母對小朋友，非常重要，呼籲大家出席518愛爸媽愛我家運動啟動禮。八方心諗，如果阿前局長咁關心下一代，想當年又點解唔聽下80後反高鐵嘅心聲？