我求大俠唔算係低頭族，不過呢排搭開港鐵，或者去茶仔食晏，都見到唔少人拎部手機chok、chok、chok，不過轉珠、打雀已經out，家陣最hit就係玩釣魚，等你拎住手機都有出海釣魚嘅樂趣。
英超曼城前鋒阿古路咁有米，又點會單靠手機釣魚，最近佢就迷上去海邊打真軍，不過技術就麻麻，玩咗幾個月都冇收穫。唔通拎英超冠軍，仲易過釣大魚?
老友介紹碼頭亮相
其實職業球員除咗日常練波，1星期1、2場比賽外，公餘時間都幾多，阿古路以往就鍾意打吓機，玩吓高球消磨吓時間，不過今季受大腿傷困擾，雖然至今都累積17個英超入球，但2月開始養傷，3月短暫復出又再傷過，到4月中先有番狀態，勉強可以踢多幾場。呢位阿根廷前鋒，喺康復期間都要搵啲搞作，好彩佢都算生性，英國《太陽報》報道，2月開始佢就由老朋友鼓勵下迷上釣魚，仲通常會由曼市揸車到黑池海邊做釣魚郎。
零收穫打機好過
起初阿古路都懵盛盛，坐喺碼頭邊釣魚，不過唔少釣友認得呢位英超球星，就帶佢去一啲多魚嘅熱點，阿古路都放下球星身段，釣友拉佢合照都冇say no。但阿古路踢波就叻，釣魚就麻麻喇，竟然玩咗兩個幾月，都次次打龜，真係衰過球場交白卷。
其實釣魚都係有益身心嘅活動，特別就係可以練習耐性，又要講把握機會能力，真係同足球打前鋒好似，不過咁耐都冇收穫，我求大俠都好擔心阿古路會半途而廢，不如好似香港啲善信咁，買大批龍躉放生，然後把握機會去釣，咁釣到魚機會都大啲，一係就去魚塘釣，細細個，成功機會都好高。再唔係就好似香港機迷咁，「單撈」番個《釣魚發燒友》（Ace Fishing）手機game嚟玩，阿古路打開機，應該好快上手。