八方噚日報道過，律師會會長林新強開記者會時，唔知點解唔肯用英文回答問題。記者會後，件事仲有下文。ATV國際台噚晚喺新聞報道上，女主播Edna Tse及Brittyn Clennett就用咗幾十秒，向林新強開拖，詳細報道阿林會長點樣三番四次拒絕講英文。
女主播開宗明義話，律師會講政改方案，佢哋唔可以報道出嚟。點解？咪因為人哋嘅態度問題囉。女主播大呻話，成個採訪過程，顯示到今時今日，喺香港呢個所謂嘅國際城市，要採訪到英文新聞，係幾咁困難。之後就原汁原味播番林新強唔肯講英文sound bite嘅片段出街。勢估唔到，律師會講政改，迴響唔係好大，但係會長點都唔答英文問題，坊間嘅反應，反而更大呀。