喺英國星期一晚，似乎特別多完場前連入3球嘅比賽喎！除咗水晶宮喺英超聯比賽末段連入3球，爆冷以3:3逼和利物浦外，車路士嘅青年軍（圖）亦都喺英格蘭足總盃青年組決賽次回合，喺完場前13分鐘一口氣連入3球，兩回合合計以總比數7:6擊敗富咸捧盃！
呢場波車路士嘅領隊摩連奴（圖）亦單拖嚟睇波，似乎係為球隊嘅未來揀蟀。不過，有口痕友就話，車路士油王班主阿巴莫域治，從來都忍受唔到球隊喺一季裏面食白果，之前3位一季內四大皆空嘅領隊雲尼亞里、安察洛堤同埋格蘭，都被阿巴莫域治請食無情雞，而今季車仔又係咩都冇，摩佬仲可以留得喺隊幾耐都成問題，仲講乜嘢球隊未來吖？
