內地樓市麻麻，喺內房高層嘅薪金都反映到。出名出手闊綽嘅恒大地產（3333）老闆許家印，雖然啱啱大派股息，佢持有公司七成股份，可以袋近55億元股息，但係佢嘅左右手，即係行政總裁夏海鈞都要減薪三成。
按恒大最新年報，唔計購股權，夏海鈞舊年淨薪金4,087萬元（人民幣．下同），減薪25%；計埋購股權，年薪總額4,900萬元，減30.7%。雖然話減薪，但係都有幾千萬，須知道大部份內房管理層只得幾百萬年薪㗎咋，所以夏總可以連續四年穩坐內房打工皇帝之位。
排第二嘅係龍湖（960）行政總裁邵明曉，人工輕微加咗1.4%，總共袋3,022萬元（但當中1,823萬元係以權股結算及股份為基礎）。千萬打工仔中以越秀地產（123）董事長張招興加薪超過兩成最多，拎到1,520萬元，但內房龍頭萬科總裁郁亮只得1,431萬元。