佔中D-Day3投票，一出閘，幾個有公民提名成份嘅方案已遙遙領先，其他好似18學者、13學者等較溫和嘅方案，就好似較為落後，但係都唔夠餘下一啲人氣唔高嘅務實方案咁慘淡，唔單止擺到明係陪跑，分分鐘可能去到佔中嗰日，市民都或者留意唔到坊間曾出現過呢啲方案。
林立志「反叛」投畀自己
就好似公務員事務局前局長王永平咁，佢喺《信報》撰文提出嘅方案，建議提委會成員由全體立法會議員組成，獲最少十名議員提名，就符合特首候選人資格，都俾佔中納入符合國際標準嘅方案，喺今次D-Day3可以俾人選擇。不過平叔就同八方講，佢呢個方案，雖然係好「創新」，可以改善到四大界別代表性不足，又有間接公民提名成份，但佢都自知，唔及直接公民提名咁令人容易受落，所以佢話「攞到一票，我都好開心」。但佢就有信心，如果北京肯用佢呢個方案，一定喺立法會攞到三分二票數咁話，最後佢拎到15票，仲多票過社民連方案。
另一個冷門中嘅冷門，可以話係民主黨林立志個方案。佢提出各政黨喺立法會選舉得票比例，決定佢哋喺提委會可有幾多席。任何政黨代表，獲不少於八分一及不多於六分一提委提名，就可成為特首候選人。民主黨今次應該要投票支持真普聯個三軌方案，但林立志今次就「反叛」一吓，「跳船」投番自己個方案，佢笑言「我怕攞0票好難睇呀！」哦！咁你唔怕卿姐大鬧「豈有此理」咩？投票結果顯示，佢得到兩票，比起得一票嘅何濼生方案算係贏咗一倍啦。
mailto:[email protected]