【本報訊】裝修工疑「等錢使」綁架前僱主3歲女童，城大犯罪學教授黃成榮形容疑犯的犯案手法「蠢到加零一」，推測他可能「等錢使等到唔理後果，即使5萬蚊都好，一定要有錢先」；甚至「恃住前老闆好人一定會畀錢，無諗過結果出乎意料，結果變成綁架！」
黃成榮認為疑犯在前老闆娘知情下抱走女童，又以手機微信傳來訊息，犯案手法拙劣，「一開始身份已經俾人知，一定走唔甩」。他又推測疑犯等錢使，可能無計可施，抱有「博坐監」的心態，「橫豎爭人錢都唔得掂，不如俾人拉咗好過俾人斬死，於是求求其其向身邊熟人埋手，是是但但要5萬元，博到坐監就算」。黃續指，疑犯也可能利用僱主好人的心理，推測「疑犯假設咗搵到老闆夫婦攞錢，佢哋睇到微信訊息一定唔會報警；豈料老闆夫婦嘅反應出乎疑犯意料，結果變成綁架」。