一些廟宇關門後設防不嚴密，香油箱亦放在一角很少天天清數。但最近港聞版上出現幾間廟宇善款被盜，廟祝擒賊的報導。
屯門掃管笏村兩間天后廟一間關帝廟的香油箱被賊人撬毀偷錢，義務廟祝向關帝誠心祈求：「如果畀我見到個賊，你就令我頭痛。」結果他在村內懸掛天后誕出巡宣傳橫額時，一名油站職員推着單車經過，廟祝突感頭痛，是菩薩顯靈了！他加以試探再埋伏監視拍照，召警拘捕之。
另一案是跑馬地譚公廟，女廟祝助理留宿時，被一名年約四十的大隻賊威嚇，逼她用被冚住自己瞓覺。詐瞓十分鐘後，偷以手機報警，慌亂下按錯speaker，與警員對話傳遍屋內，大隻賊聽到勃然大怒還搶走其iPhone──雖賊被追緝，但這過程充滿喜劇感，大家想想哪兩位藝人可合演？
以前賊人有所忌諱，盡量不會打劫陰司路或偷神明香油，怕驚擾鬼神有報應。人尚好對付，菩薩得罪不起。不過世界艱難？抑人心不古膽子大不信邪？道友為上電就不擇手段，但大隻騾騾又有正職，連小小香油錢也貪？香港的男子漢愈來愈少了。