所謂「相金先惠，格外留神」，蘋果公司深明呢個道理，所以當新任零售主管嘅阿倫特斯（Angela Ahrendts）一上場，蘋果就送約值6,800萬美元（約5.3億港元）限售股畀佢。
Angela之前係Burberry行政總裁，位列英國高薪總裁之一，上星期過檔到蘋果，新東家當然要落重藥𠱁佢。根據蘋果提交嘅監管文件，Angela獲贈113,334股限售股。以蘋果周一收市價600.96美元計，約值6,800萬美元。
Angela做夠4年，就能攞到85%嘅限售股，下月可以先袋其中約值980萬美元嘅股份，餘下15%股份就按蘋果股東回報表現畀。
蘋果獎勵高層一向唔手軟，佢嘅前任John Browett如果做夠4年，亦可袋走約值5,500萬美元嘅股份，可惜佢做咗半年就閃，睇嚟呢份工都唔易做，唔知Angela能否攞足股份呢？