高鐵建造出現「延誤」之後，費用「超支」事故後，各方責駡，跟住沙中綫亦因為在地盤挖出古物，工程被迫暫停，條沙中綫不知會延誤到幾時，建造費用當然劇增，令負責營運嘅港鐵將來不知如何收回成本。沙中綫由沙田大圍去到中環，途經現在冇地鐵服務嘅九龍城區──土瓜灣紅磡居民對之可謂望穿秋水，由廖秀冬局長時期等到今天，過咗十年有多，還是未能落成，偏偏開始建造後又遇上古蹟問題，可謂一波三折。究竟香港需要一條沙中綫還是需要保育一啲宋代古蹟，對梁振英係一大考驗，請啲立法會議員嚴肅認真考慮沙中綫沿綫居民之最大利益，唔好又係互相指駡，亂噏一通，浪費納稅人時間。
在馬場碰到惡佬明，呢位地盤總監一唔講馬，就講起建築之事，滿肚牢騷，主要係工人不夠，工程師不夠，令佢日日緊張，驚住工程延誤，原來老闆下咗命令，一概不得延遲，時間就是金錢，唔夠人就要花錢去搶；條數係咁計，如果今天用多十萬銀搵夠人開工，避免咗延遲幾個禮拜嘅話，實情來回數會係有得賺。
搶人，人從何來？惡佬明話只好透過各種渠道，盡最大努力。同時在馬場嘅建築公司老闆B就呻：「五月一號放假，五月六號又要放假，一位三十歲工程師在我用人緊張之際，竟然請假兩日，就係五月二號與五月五號，於是佢同太太可以有四、五、六、日、一、二，加埋六日假期去日本旅行。我就省佢唔好取巧啦，如果佢係秘書，我就一定批准，但工程師噃，我點肯呀，但一話唔肯，佢就話考慮辭職跳槽，激到我紮紮跳。」哦，80後年輕人鍾意如此，既然唔憂冇工做，老闆都冇佢地符，現在年輕人時興「生日假」（birthday leave），即係要求在生日當天放假，與太太／丈夫／男友／女友一起慶祝生日，左丁山知道東亞銀行已經索性將之常規化，僱員在生日月份，可以攞假一天，不在年假扣除。老闆B就話：「東亞好嘢啫，唔代表我地建築公司可以，成日掛住取巧放長假之人，我點有信心升佢做site agent？嗰位年青工程師又好希望我在五年之內升佢噃。」或者呢啲就叫做代溝，左丁山呢班人，以前從未知道有birthday leave這回事，依家要管理下一代，實幾頭痛。