10個女仔，9個半都鍾意小動物，所以，男士如果對動物有愛心，會即刻加分。亦因為咁，雖然愛華頓龍門侯活（圖）喺上場對曼城時守唔住藍月亮，無法增強我愛隊利物浦嘅爭標機會，但係佢愛護動物，所以有分加。
侯活身為美國球員，可以喺英超立足咁耐，梗係有一定實力，加上佢克服咗妥瑞症（Tourette syndrome）而成為國腳級門將，就更加令人尊敬。不過，我欣賞嘅係佢最近加入咗善待動物組織（People for the Ethical Treatment of Animals, PETA）嘅Ink, Not Mink（我紋身，但不讓皮草上身）運動，赤裸上身大晒紋身咁拍咗張海報，超型。
侯活話：「對我嚟講，保護動物好重要，當我見到有人着皮草，我真係好想佢哋坐低睇吓皮草係點整出嚟，等佢哋知道啲動物受咗幾多苦！」原來係咁，唔怪得侯活喺張海報度嘅眼神係略帶憂鬱啦！
文：吾中
以女性角度看球星新聞，唔用眉筆用原子筆寫低球壇百態！