噚日凌晨5點幾發生嘅關東6.2級地震，喺東京打完世錦賽嘅香港乒乓球隊都感受到，總教練陳江華好幽默咁話：「地震震到我哋醒晒，出去shopping仲安全過留喺酒店喇。」以李皓晴及吳穎嵐為首嘅女團，前晚輸畀東道主日本僅得銅牌，華哥話好滿意兩個21歲小將嘅表現，頒獎禮嘅時候，前體操王子李寧仲專登去支持佢哋㖭！李皓晴喺fb話：「我哋雖然輸咗比賽，但畀我們睇到未來希望，打出香港精神，感謝大家對我哋嘅支持。」
至於前晚喺準決賽贏咗香港入到決賽嘅日本女隊，噚晚決賽對由劉詩雯（左）領軍嘅中國就完全唔夠打，輸0:3，屈居亞軍，而中國就順利衞冕兼第19次封后，另外，中國男隊亦喺決賽以3:1贏德國，完成7連冠霸業。