高官間唔中都要出席吓啲議員辦事處開幕禮，選擇去邊個議辦開幕禮，都係一門學問。畀面邊個議員好？識得揀，就好似保安局局長黎棟國，揀着梁美芬。何解？一來大家都係基督徒，又係建制陣營，有共同話題囉。二來，鼠王芬個美孚新邨新議辦，得到西九新動力同經民聯支持下開設，有兩支咁強勁嘅水喉射住，唔怕冇好嘢食嘛。嗱，有相為證，你睇黎局長喺開幕禮後，吮豬頭骨吮得幾滋味！睇嚟局長嘅食相，就知道佢一定係食家啦，識得食，一定係食呢種豬頭骨！食完嘢後，黎局長就接受傳媒扑咪，係咁意聲討吓反高鐵人士衝擊警察防線好暴力，所以警察出動胡椒噴霧有理。食飽飽又上到電視交到差，輕輕鬆鬆就過咗一個上午。