人有三急唔係錯，隨街便溺先係大錯特錯！繼蘇錦樑發表包容論後，民建聯元秋又出招，呼籲啲餐廳、酒樓開放廁所畀遊客「方便」，可以減少爭拗咁話。嘩！民建聯想「成功爭取」全港食肆變公廁？其實貴為阿爺親生仔嘅民建聯、又係香港最大政黨，全港各區有咁多辦事處，如果以和為貴，八方建議民建聯全面開放各區議辦、仲有炮台山總部嘅洗手間，包容吓內地自由行旅客啦，咁樣阿爺應該好開心喇！
五一黃金周終於結束，唔知大家有冇見到遍地黃金嘅盛況？內地官媒《人民日報》海外版噚日就報道，話黃金周嚟香港嘅自由行旅客人數跌咗，同網民發起嘅「驅蝗行動」有關。
怕自由行唔嚟香港
報道引述元秋話，香港自回歸阿爺嘅懷抱，中央政府處處畀香港「特別關愛」，但少數激進分子竟然以「搞事」回贈，好擔心內地人不滿唔再嚟香港咁話。元秋仲建議佢偶像梁振英要加快宣傳，等內地遊客熟識香港人生活習慣，仲話如果唔夠廁所，餐廳、酒樓應該開放廁所畀遊客方便。
有飲食業界就同八方講，其實𠵱家旅遊區嘅食肆、餐廳、酒樓同酒店多不勝數，全部都有廁所，雖然真係有餐廳好鬼小家喺門口貼住廁所唔外借嘅通知。但業內人士同八方講，𠵱家飲食業嚴重缺人，侍應都唔夠，仲邊度得閒理啲客係咪入去幫襯、定去廁所？而且絕大部份食肆都好歡迎遊客同香港人入去解決，不過最大問題係就算開放廁所，啲自由行肯唔肯去先？
mailto:[email protected]