上星期講Domani，一位有37年年資嘅酒店人Chu先生來電郵云，世界上無六星酒店，最多只有五星，請左丁山澄清，以免誤導下一代。呢點左丁山係知道嘅，但香港時興叫一啲超級豪華酒店做六星，所以間中從俗，既然有Chu讀者咁認真，以後下筆冇咁手鬆可也。
連日有朋友向左丁山表示，Domani關門實在可惜，問及會唔會另覓地方從頭嚟過，據消息人士說，短期內不大可能，因為一來好難搵到類似嘅地方與氣氛，二來租金實在高，要計掂條數並不容易，譬如尖沙嘴金巴利道間Grappa's，因為加租，生意雖然好，亦難以負擔，索性關門了事。如此說來，用一般流行講法，豈非「地產霸權」惡晒，成日加租，趕走幼稚園，趕走餐廳，趕走街坊香燭舖與花舖等等，一位朋友話：「你仲唔鬧吓啲業主？」
咁又唔會，左丁山乃典型自由市場派，堅決反對任何價格管制。獅子王日前見到地產代理／免費報紙嘅施老闆，同施老闆講起，知道呢位青年時期深入研讀馬克思學說嘅施老闆，對住宅租金管制絕不贊成，更加反對不准商場商舖自由加租。理由不必細說嘞，在資本主義社會，讓市場決定價格，係不可動搖嘅金科玉律，總之取決於供求，有升必有跌，只是香港地少人多，長期趨勢係土地、樓宇與商場處於求過於供嘅情況，故此樓價與租金長期上升。香港係一個高成本地方，你唔鍾意都冇辦法。唔好以為在商場或其他地方開辦牟利幼稚園賺錢，開咗二十幾間咁多，類似連鎖店經營就可以借學生為擋箭牌，續租不遂就發動幼童上街，博人同情，以他人情緒性反應嚟支撐自己嘅冷酷計算（cold calculation）。在商場租舖辦餐廳與牟利幼稚園，本質皆是做生意啫，根本毫無分別。左丁山其實係不反對辦學賺錢嘅，既然香港法例容許，有乜唔得？但既要賺錢，就唔好假惺惺以清高教育嚟包裝盤生意啦。有記者打電話嚟問及「老友H」（見四月二十二日本欄講辦幼稚園）可否接受訪問，因根據佢地粗略計算，天水圍間幼稚園真係好似幾好賺，想搵老友H問清楚幼稚園辦學經費與收益嘅詳細數字。可惜吖，老友H趁假期上咗郵輪雲遊四海，一時間難以接觸到佢咯。