【記者陳雪玲報道】泛民絕食爭普選第二波料在6月舉行。由一開始被揶揄為「絕食騷」、到後來被質疑「偷食」，參與首階段絕食的民主黨胡志偉、尹兆堅及工黨郭紹傑，在一片「柴台」聲中堅持了16天。回想肚空空的384小時，他們相信縱使力量微弱，仍可顯示為普選「嚟真」的決心，希望今次「博到盡」，換來下屆有真普選。
最大壓力來自家人
絕食三子面對最大的壓力，不是挑機者，而是家人。郭紹傑絕食期間與戰友談笑風生，原來心中苦澀：「我太太喺絕食前一星期、3月21日搬走咗，嗰日係16周年……結婚周年紀念。」他嘆謂多年來搞社運、工運，或多或少影響與太太關係，雖然至今未與太太修好，卻慶幸獲一對子女體諒，並在絕食後期到場打氣。
胡志偉絕食期間撞正太太生日，慶祝活動是從中環滙豐總行絕食現場散步至金鐘立法會，夫婦二人短敍片刻慶生。胡志偉笑稱決定絕食前未事先與太太商量，只拋下一句：「下個星期唔返嚟瞓……」他憶述，太太聽罷無言以對。
幸好胡太年輕時也走在社運前線：「我比較好彩，我係做呢個工作（社運）時結婚，由天地初開佢揀我，或者我揀佢時已知道係咁。」
父母一句「仔細老婆嫩呀，（絕食）都差唔多喇」，幾乎令尹兆堅「失守」，幸而老婆願意守住大後方，暫時獨力照顧子女，令他絕食無後顧之憂，笑言：「屋企嘅拉力、推力都有。」
希望泛民更加團結
「絕食為乜？有用咩？」三人絕食期間不停被質疑絕食「冇用」；尹兆堅受訪時對此憤憤不平：「批評絕食嘅人，係一兩個月前、同一批人話泛民冇嘢做，佔中冇料到……到3月兩會之後低氣壓好勁，佢哋又話泛民唔出聲……到你去絕食喇，又話冇用，咁佢真係冇得輸㗎喎！」他指絕食首星期在冷嘲熱諷中捱過，至第二星期多了市民關心，振奮了士氣。
郭亦說，預料未來抗爭路上依然會有「口講自己人，但喺背後插你幾刀，拉你後腿嘅人」，希望泛民更加團結，但不會妄想扭轉這些人的想法，「做到幾多得幾多」。
胡志偉強調絕食是給中央一個警號：「我哋係嚟真會做到盡。」他提醒港人共產黨打壓民主絕不手軟，要為自己站出來。