經常去日內瓦聯合國講述香港人權情況嘅民主黨劉慧卿，2012年慘遭搶手袋，事件過咗一年半，無阻卿姐繼續去聯合國，不過今次太多文件，以往孭開手袋嘅卿姐，今次決定做變身自由行，做「篋神卿」現身日內瓦。
卿姐噚日搞咗個傳媒茶敍，公佈佢「再衝聯合國」之行。卿姐話，今日去完佔中商討日投票，晚上就會飛去日內瓦，出席聯合國「經濟、社會與文化權利委員會」周四嘅會議，講畀國際社會聽，香港普選無望、新聞自由正值寒冬、基層苦不堪言嘅情況，促請政府履行《經濟、社會與文化權利的國際公約》。
前年在日內瓦被搶手袋
卿姐憶述2012年喺日內瓦俾人搶手袋時，仍然津津樂道，話自己當年俾人夾硬喺條街上搶手袋，最終力保不失，而個賊係個吸毒成癮嘅法國人，最終被送官究治。卿姐話，最擔心唔係俾人搶錢，而係俾人搶走護照，返唔到香港最大鑊。當然啦，卿姐已經冇回鄉證，冇埋個護照，到時邊度都唔使去。
卿姐話，今次會帶大量文件去聯合國開會，又多又重，所以今次唔再帶手袋，改為做「篋神卿」，拖篋遊瑞士。上次畀個賊搶爛咗嘅手袋，卿姐已經略施小計修補番，隨時可以再戰江湖。