春夏之交，教人諗起25年前嘅北京、香港一段波瀾壯闊嘅爭取民主運動。25年來，唔少香港人都依然毋忘六四，一班民間團體同藝術家，係5月份就準備咗三個民間六四展覽。今次展覽係得到1908書社協助，其中一個名為「看不見的諷刺展」，由5月4日至6月6日，喺書社舉行，展出相關漫畫、網上改圖同「六四行為相片記」。參展人將收集到嘅作品印到一本書嘅大小，然後將啲相包喺書面，再放番入書架中，等上嚟打書釘嘅朋友，可以一拎起本書，就睇到展覽作品，呢啲作品，包括馬龍、Kit@社漫嘅漫畫。提起六四，好多人都會聯想起坦克車，民間電台將會開辦「巨大坦克模型工作坊」，具體時間待定，做完坦克之後，仲會舉行「巨大坦克泊車展覽」，目標係喺各區咪錶位，展示坦克模型。