𡃁模尹蓁晞（Yumi）愛貓又愛狗，佢近年越養越多，將軍澳嘅屋企共飼養咗四狗兩貓同兩兔仔，其中年約9個月嘅英國短毛貓仔Dundee前日貪玩爬窗，咁啱新居又冇窗花，Dundee就變咗空中飛貓，不幸由68樓墮樓慘死，Yumi痛失愛貓通宵喊到眼腫。
Yumi前日發現唔見咗Dundee，慌張喺Instagram留言：「Dundee，唔好嚇我，你去咗邊呀？下午開始失蹤了，找遍全家裏找不到你。」Yumi出動埋男友陳偉成（Avis）幫手尋貓，Avis噚日喺電話度話：「今朝凌晨我哋報咗警，結果凌晨喺大廈地下草叢搵到Dundee屍體。」
疏忽照顧遭鬧爆
Yumi接受唔到Dundee突然離開，佢再喺Ig貼咗同Dundee生前靚相留言：「剛剛知道你已經不在了，我真的很難過，心在流淚， 但是自己哭不出來。」Yumi又貼咗Dundee慘死相話：「你為甚麼那麼儍？我懷念你每天過來我房間，懷念你不給我玩電腦，懷念你很愛吃雞，我真的很想你。」Yumi噚日喺電話自疚疏忽令Dundee跌死：「好傷心，我會幫Dundee安排寵物善終，幫佢安個靈位，仲會立即喺窗安番啲網。」Yumi痛失愛貓已好唔開心，同時又被網友鬧爆佢疏忽先導致呢次意外。
撰文：馮仁昭
