噚日佔領中環商討日三（D-Day 3）「優先場」，畀一啲聽日未能投票嘅人率先表態，就15個入圍政改建議方案，選出最後三強。
投票氣氛就真係講唔上，最積極喺投票場外為自己方案拉票嘅，要數學民思潮。重炮手黃之鋒喺場外，用iPad寫上「我未夠秤，請幫我投票」，為學界方案拉票之餘，亦都可以間接為佢做主角嘅紀錄片《未夠秤》宣傳吓，可以話一舉兩得。
學人話選情告急
噚日投票下午4點幾先開始，約八名嘅學民思潮成員唔夠兩點已經喺場外拉票，之鋒就舉起「我未夠秤，請幫我投票」嘅字句，希望嚟投票嘅人支持學界方案。
選情早已一面倒，但之鋒話佢哋選情嚴峻，唔樂觀，十足十立法會選舉時，個個候選人都話自己唔夠票、要告急一樣呀。
同場有真普選聯兩位仁兄為三軌方案派單張拉票，不過真普聯召集人鄭宇碩就冇現身咯。「人多勢眾」嘅學民仔個勢都贏晒，帶嚟嘅大聲公都可以唔使用㖭。
舉起「未夠秤」呢三粒字，即刻收到拉票同宣傳新戲之效。喺紀錄片《未夠秤》擔正做「男主角」嘅黃之鋒話，套戲反應唔錯，知道唔少人入場都睇感動到喊，特別係佢高喊「梁振英下台」嗰一幕。
之鋒話，聽日D-Day 3，學民思潮會喺各區參與商討，但由於佢哋八成會員都係「未夠秤」投唔到票，所以喺商討日時，各學民成員會游說組內嘅人支持學界方案，同時亦會喺場外拉票。
mailto:[email protected]