貴價茶餐廳翠華（1314）今年初以月租過百萬元，搶走阿一鮑魚原本位於銅鑼灣駱克道嘅巨舖，搞到阿一要搬去附近嘅銅鑼灣廣場，翠華呢間8,000平方呎新舖上月中低調開業，外面裝修確實幾特別，唔似普通茶餐廳，裏面有三層任坐，華華上周平日中午走去八卦，食晏時間都唔使等位。
根據土地註冊處資料，呢個巨舖嘅新租約首五年每月租金係122萬元，較阿一嘅舊租升76%，平均呎租超過150元水平，一簽十年。翠華主席李遠康曾經表示，呢個旗艦店係地標式戰略據點，裝修具有歐洲馬戲式主題。
除咗租金貴，呢個舖嘅經營成本應該唔細，眼見每層約有6名樓面，另有一人負責水吧，計埋廚房，加埋燈油火蠟、食材費用，唔知每日要賣幾多翠華名物先夠維皮。剛過去五一黃金周，內地旅客入境數目又跌1.7%，單靠強國人似乎未必實掂。