【銅鑼灣利舞臺】嚟緊星期日係母親節，吳綺莉同羅霖雖然都係單親媽媽，但平時行街、睇戲、食飯都有子女陪伴慰藉，令佢哋同樣擁有幸福、快樂人生。
前日下午6點幾，吳綺莉同「小龍女」吳卓林結伴去銅鑼灣利舞臺一間髮型屋整頭，兩母女無論身形同打扮都好相近，同穿T恤及黑框眼鏡。14歲、剛踏入青春期嘅小龍女開始識扮靚，左手戴手𠼦同兩隻戒指。
逗留約一小時，兩人去咗利園攞車，等𨋢期間不約而同對住𨋢門反光面照鏡。之後駕車返回大埔中心，吳綺莉一人落車去咗茶餐廳買飯盒同飲品，囡囡就獨留喺車上等媽咪，之後母女返家撐枱腳。
同細仔睇戲買嘢
【中環ifc】剛與劉坤銘分居嘅羅霖，日前就同細仔Jonathan以及一名中年女士到中環ifc戲院睇《奇鸚嘉年華2》。下午4點半，佢哋入場先到city'super買嘢飲，Jonathan推住購物車玩得好開心，連媽咪問佢飲乜都唔應。睇完電影，Jonathan就乖乖陪媽咪shopping。
採訪、攝影﹕朱志明、畢紹基、吳耀輝
