【救人自救】
不少人閱畢Chris的網誌後都主動聯絡他。經歷過最難捱時刻，Chris深明獨自對抗HIV的無助感。因此每有求助，他都義不容辭。他坦言，他所接觸的不少患者，對社會都有強烈的復仇心態，「覺得我既然染上絕症，就要全世界一齊同歸於盡，將病毒不斷擴散開去」。
Chris接觸的30多名HIV帶菌者，九成比他年輕，年紀最小的只有17歲。「佢人生第一次有性接觸就係同男朋友，以為唔需要做安全措施，結果第一次就中招」。還有其他性病患者，他苦笑說：「就連椰菜花都搵我，性病你都話有得醫，但我個病本身冇呢。」
在眾多HIV帶菌者中，最令他深刻的是一對同志伴侶，其中一人因另一半不忠，雙雙染病。「你以為佢哋會分手，但佢哋反而更加唔會分開，因為大家都已經冇嘢可以失去，唔可以冇埋對方」。
對人性有另一番體會
接觸到不同人後，Chris對人性亦有另一番體會，「人本性都係善良，好多時只係一時諗唔開。以現今醫學，只要生活健康，HIV感染者只會比一般人短壽數月，若果你比我年長一年，我有好大機會可參加你個喪禮」。他以自身經歷鼓勵同路人：「我冇畀不幸摧毀我嘅人生同帶走我嘅快樂，我想告訴你，you are not alone。」
《蘋果》記者