唔少落過注嘅香港人，都算係幫過馬場鋪草皮，所以呢，個馬場都可以話係香港人有份㗎。馬會見沙田馬場自1978年開鑼後，唔經唔覺，同香港人度過咗35個馬季，所以製作咗一輯叫做《香港人的馬場》嘅五集短片，喺電視台播放。呢類短片內容離不開介紹沙田馬場人和事。較為罕見嘅係，馬會物業部員工黃國平，喺短片中攀上全港獨有嘅馬匹亮相圈活動天幕頂，又會介紹吓畀馬匹平日做gym用嘅行馬機，俾大家知道部機係點維修。大家仲記唔記得，香港以前有位羽毛球運動員陳念慈？佢家陣去咗馬會見習騎師學校做校長。陳念慈做咗校長八年，培育過唔少出色騎師，包括兩奪香港盃嘅蔡明紹。