運房局長張炳良涉與港鐵合謀，向公眾隱瞞高鐵延誤，被揭發後死不認錯，仍以為求其搵個臨退休嘅周大滄孭晒就可以過骨，充份顯示在梁振英治下，上至特首，下至各級問責官員「無賴」作風。為官者能夠唔要面，香港人又奈我乜嘢何？
梁振英、陳茂波、吳克儉、黃錦星一眾無能無賴官員，上任至今表現庸碌，以寫網誌及外訪為本業，推動政策就側側膊，拖累政府民望低殘，就諉過於鍾庭耀民調、英國特務霍德、顧汝德幕後操控、李慧玲及《蘋果》針對。局長每個月乾𢭃三十幾萬，幾年後拍拍屁股走人，臨走前搵定間大學開定個研究中心主管職位，張炳良、陳茂波、吳克儉、黃錦星一棚空降梁粉局長，試問邊有得輸。
據官場中人透露，針對高鐵延誤，原本「張良計」係「隊」晒落去港鐵管理層，由佢地孭晒，再郁一兩件平息民憤。2012年中政府已知工程進度滯後，舊年梁振英委任前經商局長馬時亨、前運輸署副署長陳阮德徽入港鐵當非執董，𥄫實港鐵，整頓主席錢果豐及下邊管理層。張炳良忽然驚訝，不過係準備「推莊」卸責，屬擬定劇本一部份。
如果佢2013年仍唔知高鐵嚴重延誤，難以追回，搵馬時亨及陳阮德徽入去托咩！再者張炳良乃代表政府及公眾監督港鐵，佢下邊有運輸署官員及專業人員幫手作評估，點可能只聽港鐵一面之詞便「疑中留情」，相信可以追回落後進度。更可笑係對於減低延誤，港鐵評估樂觀，政府卻唔樂觀，試問如何有一個說法可包容雙方南弦北轍嘅立場？
張炳良如果真係信錯港鐵評估，就屬無能，判斷失誤；若果係串謀港鐵夾計隱瞞，就屬無恥，操守成疑。是但一個原因，至少應向公眾道歉，點可能若無其事？至於所謂獨立調查主席李焯芬因利益衝突閃電辭職鬧劇，點可能一句「蝦碌」就過骨？鬧劇顯示政府所謂調查高鐵係門面功夫，求其搵條自己友建制派孭起，方便日後指揮，配合政府計劃行事，李焯芬曾力推國教，乜嘢料大家心知。而張炳良急不及待宣佈，就為咗頂住立法會特權法調查壓力，張炳良為政治目的行事，所以先冇諗過利益衝突一事。至於港鐵狗急跳牆，自然選擇與政客「攬炒」。李焯芬鬧劇，隨時係港鐵反戈一擊，打爆張炳良。
在眾多梁粉局長中，張炳良是政務官眼中最正常、最有水平一個，同政務官開會有理有據，並非一味政治掛帥，比陳茂波、邵善波、張志剛等高出幾皮，殊不知一去到問責交代，梁粉系語言偽術，死不認錯嘅本性就盡現，衰收尾。
有梁振英、陳茂波、吳克儉等先輩，示範咗「人不要面天下無敵」絕技，立法會即使有不信任動議，張炳良一樣每月照𢭃三十二萬人工，奈之何！
添馬男