負政治責任，引咎辭職，係日台韓常見嘅事情，例如最近南韓發生「歲月號」海難事件，總理就自動道歉辭職，以示負上政治責任，因為監管船公司運作及驗船等，應係交通運輸部門嘅責任，上頭就係總理，總理辭職不幹，有其道德勇氣，但點解有關部門負責人唔辭職呢，此則令人費解。
南韓係一個集體意識好強，國民愛國，願為國犧牲嘅國家，歲月號海難事件發生後，大家先知道多啲，代船長與船員不負責任之極，率先跳船逃難，置沉船及乘客於不顧，係人物無恥之尤，船上超載乘客、漏報大量貨櫃、意圖逃稅、欺騙政府、無視乘客安全，係公司倫理破產，大大影響南韓國家形象、聲譽，唔怪得CNN報導話南韓已有一個後遺症，就係南韓人集體抑鬱（depression）。
香港素來唔興「部長辭職」呢一套，以前有過梁錦松、楊永強辭職，係在巨大輿論壓力之下，不得不為嘅，但今屆政府真的「視民意如浮雲」，房屋及運輸局長張炳良坐在三煞位，先有2012年十一海難，繼有2014年高鐵工程延誤醜聞，還是好官我自為之，點會仿效南韓總理呀，特區政府內部好難有人願意負上政治責任咯。
工程A就話從實際出發，張炳良辭職嘅話，一來特區政府攞唔到甚麼政治分數，二來運房局留下爛攤子，學界、商界名人有邊個肯捱義氣，代張炳良做局長呀？工程A話田北辰講得幾啱，今時今日，地鐵工程總監周大滄辭職，去邊度搵一個夠資格夠經驗嘅工程師去做佢個位？西九高鐵總站工程總經理鬆人，又去邊度搵人替代？工程A相信最後會由現時嘅港鐵工程人員升職就位，外人就一定唔肯熱飯熱食嘅嘞，俾多多錢都假。高鐵呢單嘢都不知如何埋尾，碰啱前九鐵主席田二少係現任議員，港鐵與九鐵合併，田二少被退職，令佢心有不忿，意氣難平，今天在立法會主理鐵路事宜，整定港鐵冇運行咯。富公子錢果豐做港鐵主席嘅日子睇嚟已經開始倒數，誰人代替？以前有人猜測馬時亨會接棒，但呢位圓滑賓架並非今天港鐵所需人才，搵一位硬淨工程師做港鐵主席似乎更好。