股神畢菲特今年8月生日就84歲,好多人都擔心佢將來百年歸老,冇人繼承到佢嘅投資傳統,佢嘅投資旗艦巴郡亦跟住末落。早前股神建議,佢死咗之後留畀太太嘅信託基金,10%投資政府短債,90%買領航標普500指數基金,完全冇提巴郡,唔通佢都對巴郡前景冇信心?
股神年初向股東發公開信,提到死後會成立一個信託基金留畀太太,點名提議將90%資金,投資領航投資嘅低成本標普500指數基金。日前喺巴郡股東大會上,有位投資者就問股神,點解唔買巴郡?係唔係股神預計標普500指數基金將會跑贏巴郡?
股神首先講笑話「封信會唔會係領航嗰邊寫㗎?」跟住佢就認真撐番巴郡,指巴郡喺佢死後12年都會一如以往表現咁好,但對於佢太太,目標唔係獲得最大回報,而係要穩陣。經佢咁提一提,領航肯定受惠。
領航謙稱,事前唔知股神會咁講,不過股神嘅言論就肯定咗公司嘅策略。