大市陰乾式下望，一個個曾被捧上天的新經濟板塊回歸現實，前陣子，大家仍視調整為低吸良機，但下跌了兩三成之後，陸續有人望而卻步，回歸基本可能更實惠，開始有投資者着眼於一些老牌企業，貪其禾稈冚珍珠，力寶系是其中表表者，老股民多年來唔多唔少都會炒過力寶（226）、力寶華潤（156）、華人銀行呢批股票。那些年金融風暴前，有唔少東南亞財團嚟香港搵食，但九七金融風暴一役，東南亞貨幣急跌，對這一班商家當然有極大影響，當時印尼盾急跌，作為印尼頭三大財團的力寶，自然大傷元氣，一直沉寂了好多年，直至幾年前先可以見得到佢哋蹤影，除咗搞番老本行地產投資外，最令人記得就只係年幾前攪左一隻力寶專選中港地產的ETF（2824），但近日留意他們的一連串行動，就唔多似想在香港再加大發展。
力寶華潤近期以公司轉讓方式沽出力寶中心全層物業，套現2.8億元，更在去年年底出售上海力寶廣場給姊妹合營公司，套現逾8億元，並打算設立商業房托在新加坡上市。
這些動作，雖然唔講得係撤資，但最起碼都係減持香港資產，近日仲出了一份幾特別嘅公告，公佈委任一名外部財務顧問，對集團架構，資產及營運進行策略性檢討。
通告一出，成交已先動，梗係啦，𠵱家出到聲表態擺明車馬話有攪作，雖然只係搞份顧問報告，我就唔信顧問報告會叫你去邊個國家搞先好，用邊team人最fit，人工薪酬合唔合理咁簡單。一份報告正常都應該交代下個公司結構，估值、有無隱藏資產，隱藏負債咁上下，不過其實搞咁多野，最後都係不外乎開三瓣，一係私有化、一係就重整業務、當然最好係賣殼啦。
單係改名已有憧憬
照目前情況來睇，賣殼的機會應該最大，首先母公司力寶剛公告發展韓國賭場度假村，成本不菲，雖然創辦人李文正否認對賭場事業感興趣，反而有意進軍美國房地產，剛亦以3.68億美元買入U.S. Bank Tower，但無論韓國，還是美國，發展也要搵水，以其市值根本與所控資產不匹配，亦無必要擁有咁多間上市公司的殼，你睇吓whatsApp，有時簡單些，價值仲容易釋放。
再睇番幅圖，上年12月市傳前財爺梁錦松（現任南豐集團行政總裁）想幫南豐借殼上市，其中一個對象係囝囝力寶華潤，股價一日便爆升四成，傳言一過，無後續消息，理應散散哋，但事隔五個月，市價仍企於當日急升高位之上，實在有違地心吸力 ﹔力寶華潤（156）現在與華潤已無關係，而華潤系近日出事，為免張冠李戴，改名勢在必行，單是改名已可能令人有一番憧憬，當然，這煲佛跳牆可能有排煲，甚至只係煲無米粥，不過，就算最後跑出056、983、687，力寶華潤食唔到賣殼的自摸六番，得番業務重整的三番牌，其實都唔錯喇，老實講，近排大市走勢，有時出少鋪統，就等於食多次糊。總之，我最希望156一役之後，下次響blue bar再見到梁錦松可以再次叫佢一聲「財爺」。
張士佳
註：筆者持有力寶華潤（156）股份