如果只因摩佬贏得多就討厭佢，未免太膚淺；討厭摩佬，是因其處事行徑。例如慣性猛烈抨擊球證，圖為球證增加壓力以獲取着數，已夠卑鄙；而數月前被韋斯咸悶和0:0時，他轉而抨擊對手「泊架巴士喺龍門」、「唔係嚟踢波」、「係19世紀嘅戰術」，極盡辛辣諷刺；數月後，到車仔作客利物浦，摩佬喺球門泊夠兩架巴士！兼且上半場已肆意拖時間，執波、受傷，完全唔係踢波；然後因謝拉特無厘頭攞甩腳，再跣底，兩個百分一機會出現的犯錯離奇地同時發生，致令車仔先開紀錄，直接導致贏波，賽後他竟大大聲說：「The better team won！」
贏波時囂張、鬧人時寸嘴，我其實好欣賞，係增添娛樂性；但上述的雙重標準，令我想起一位嘴唇厚過孖臘腸的政府要員，在特首選舉前民調話民意撐梁特首就大讚民調「可靠」；到民調不滿特首表現就話「民調有問題」，兩種輸打贏要，一樣令人氣憤！所以歐聯4強看摩佬再施大巴戰術，卻被馬體會轟入3粒，巴毀車亡，難免有點心涼。
憤怒的背後，其實是恐懼。你看他在首季重返車仔的磨合期，在欠缺銳利的箭頭下，已令車仔成為英超失球最少球隊、一直有力爭冠、歐聯闖入4強。如果迪亞高哥斯達或同級射手來季加盟，曼城、利記等別隊球迷，預備定日日要唱《我是憤怒》都得！
方柏翹
now足球評述員