內地五一黃金上星期展開，香港好彩冇出現遍地「黃金」嘅景況，對本港零售市道嘅影響仲未浮面。不過，內地金舖早覺市道唔多暢旺，喺今年勞動節減價大酬賓。金舖除咗免手工費外，金條亦大劈價。事隔一年，中國大媽似乎學精咗，冇重蹈覆徹盲搶金，宜家仲以過來人身份同大家講吓買金要留意嘅事。
中國大媽去年蝕幾多？如果以去年黃金銷售總量100噸計，埋單計大媽們累蝕46億人仔，齊齊坐大艇。如果大媽喺去年買入一條金條，當時價格為每克312元人仔，相對現在每克274元人仔，已經唔見咗38元人仔。計埋手續費同回購差價，蝕得仲多。
中國大媽們經歷去年嘅教訓，今年見到金舖大減價都會「停一停、諗一諗」。大媽們收到風，知道洛陽地區金礦開工率唔夠一半，實際產量只維持一成左右，另外有部份中小型黃金礦山已經處於停產或半停產狀態，消息將阻礙金價反彈力。大媽們又提提大家放眼世界，可以留意吓美國經濟正逐步回穩以及美元上升，將不利金價。同時，大宗商品包括銅、鋁等價格下跌，拖累金價齊跌。而上半年現貨金銷售正值淡季，估計最快第三季度需求先會回升。大媽睇番宜家各國股市又幾好，加上通脹惡魔又未殺到，大媽們估計金價今年繼續浮浮沉沉，上漲動力有限，大媽們都覺得按兵不動先係上策。
C+B
本欄逢周一刊出