今年跑少咗，所以寫少咗跑，最近開始跑得郁，先發現原來唔跑嘅日子，miss咗好多嘢。原本，作為一個更投入嘅球迷，呢個球季係令人好唔得閒嘅，英超嘅瘋狂、西甲嘅強勢，世界盃嘅就快到，真係氣都唞唔切，尤其係喺完場前後，大家仲要喺虛擬世界繼續開波，大腳抽人又有，俾人大腳抽番轉頭更多。球員落場之後，球迷們接力出場，徹夜不眠分秒必爭，作歌改圖食字反話刀光劍影，從球迷參與嘅活躍程度嚟睇，呢個可能係史上最好嘅球迷年代，但慘就慘在，我哋呢班球迷，鬧完一輪之後冇一個係贏家，亦冇一個人或一個組織，可以將各自為戰嘅所有熱血球迷們，凝聚番埋一齊。所以，呢個可能係最差嘅球迷時代。
本是同根生，大家香港仔，其實一支有代表性嘅香港隊，就有權將大家擺埋一齊，一家人齊齊整整，好似西班牙嘅皇馬巴塞馬體會嗰頭打餐死，呢頭喺國家隊就即刻攬頭攬頸，球迷們接收到嘅信息係，死對頭其實可以係老隊友，但香港嘅環境呢，死對頭就永遠都係死對頭。
有感而發係有日，自己po咗個message話咁多人被炒，點解仲未炒大sam，點知被球迷甲一個reply：「唔使降班仲唔心足呀？」又係喎，因乜我可以要求咁多呢？而我發洩講兩句又對呢隊波有咩影響呢？情形就好似一個儍佬對住個井係咁講粗口，發洩完之後一啲得着都冇，仲要口都乾埋。
同一日黃昏我走去跑步，本來想偷懶hea行就算，點知發現喺運動場上嘅，個個都係正能量大合唱。第1個圈撞見一位從政嘅後生仔，估唔到佢除咗西裝竟然有6嚿腹肌；第2個圈我見到一對夫妻，老公在喘氣、老婆在打氣；第3個圈遇着長青藝人，步履輕快過唔少後生仔；第4個圈，我決定唔畀自己停……多謝跑步，提醒我運動原本就係應該散發汗水，而唔係掛住抽水。
KEYMAN
now TV主持