五一放假，人地去玩，左丁山就在屋企瞓覺，夢會周公，午飯時份，工程師A來電約去中環飲茶，點解要去中環？方便佢飲茶後，返佢港島公司總部與上司下屬見面開會檢討若干項目嘅工程進度喎。佢平時成日在外面地盤工作，巡視，竟要等到「勞動節」假期，地盤停工，先至走返公司總部開會向上司匯報，認真檢討公司手上工程合約嘅進度，可見得平時工作幾咁緊張。
不過要在假日返中環飲茶？自己平時都飲到夠啦，咪攪咯，情願留在屋企吃麵，睇吓報紙好過。工程A講到工程，話最近因高鐵工程延誤，沙中線有古物事件，令到公司有份嘅各個工程項目，不分公私，風聲十分緊，本來冇事嘅都會被下令立即檢視，有小事（minor嘢）嘅，被下令從速補救，總之越高級越唔得閒，只有地盤工人可以一收工就去享受一杯啤酒、一大嚿叉燒。工程A手下一名地盤總管，每每一知道有黃雨警告，就會終宵失眠，老婆要逼佢食安眠藥。
工程A講過，今日香港巨大工程項目多，公屋居屋私樓項目多，碰上嚴重缺乏建造工人情況，建造界根本疲於奔命，難以應付。佢話建華八年，經濟疲弱向下，董特首凍結大部份政府工程，建造業以粥當飯，捱得辛苦，到咗蔭權七年，大力救市托市，私樓工程大幅度減少，但十大基建上馬，建造界開始有豬肉湯飲，然後到振英二年，十大基建未完，吹響行軍號，大舉增加建屋數量，公屋、居屋、私樓工程全面開展，建造界飲豬肉湯食燒鵝髀。但美食太多，唔係僧多粥少，而係飯多僧少，難以消化，假設能量（capacity）係100嘅話，依家嘅能量使用率（capacity utilization rate）已經去到120，根本係做到疲於奔命，碰上風風雨雨，偶有意外嘅話，就會落後於工程進度。落後咗，係唔係一定可以追得番？誰也沒有把握。追究責任呢？工程A話：「咪人頭落地囉！但如果我要手下負責任，炒佢魷，上頭又要我負責任，請我退休嘅話，咁公司有人能夠完成餘下工程咩？梗係冇啦，越要工程師負責任離職，工程進度越難追。」