【本報訊】鄭寶鴻是香港掌故專家，傳媒都愛找他「考古」。「五、六十年代，生活貧苦但有希望，唔同𠵱家」。新書以張國榮名曲《默默向上游》為名，當中200張黑白圖片，大部份首度曝光，由三代屈在閣樓的山寨線紗廠，到物換星移的石板街，見證兩手空空的流金歲月，「憶苦思甜，先懂得珍惜」。對比今日的眾生喧鬧，昔日友情歲月，這個視講香港故事如傳教的「老土先生」，笑語特別令人懷念。
記者：呂麗嬋
「兩腳一伸就咩都冇，不如講多啲，多幾個腦記住」。鄭寶鴻在中環有間小店，玻璃櫃內放的，都是他的寶，由英女皇錢幣到黑白老照片，書本雜物堆滿一地，枱面是一叠叠的原稿紙，寫的，盡是他心中的永恒年代，「守望相助嘅年代，就係我成長嘅年代！」這個小店老闆，其實更似現代講古佬，行過石板街，他會指着鐵皮屋頂的生銹煙囱，告訴記者那是早年地下公廁的「遺物」；隨手指指街角的小攤檔，一樣有段古。
「舊鏞記就喺呢度，對正公廁條透氣喉，以前啲枱放晒出嚟，個個都係聞廁郎！」這種笑話，鄭寶鴻總琅琅上口，你未笑，他自己先笑至腰果眼。訪問當天，鄭的手機就響個不停：市建局邀請他主持「老香港」講座；再過幾天，又權充義務導遊，帶市民坐開篷巴士夜遊油尖旺，感受「消失中的霓虹」。對於「話當年」，他來者不拒，只因但覺今日的香港人，總是愁眉不展。
「五、六十年代生活艱苦，但人與人之間有人情味，一層樓七、八伙人，住得逼，嗌交梗有，但煲親糖水，一定每戶送一碗；兩夫妻去晒返工，啲小朋友就交畀鄰居照顧，互相幫忙；就算老闆都有情，唔使簽合約，賺到錢，一樣分紅畀你」。在他眼中，尋找消失中的香港，是一帖下火涼茶，「嗰時人人追求三樣嘢：收音機、電飯煲同風扇；分到廉租屋，就想有部電視！」
貧亦樂，竟成了「文化遺產」，「𠵱家成日鬧蝗蟲，世界係唔同咗，以前一百萬人口，𠵱家七百萬，逼好多，但係咪真係要咁？」當一坨小童便便、一個女學生自白式的奮鬥故事，也可掀起一場戰爭，這個埋首上世紀古物人情的老土先生，很疑惑：「我喺香港出世，只因我阿爸阿媽嗰代早嚟香港，但我嘅父母同親戚，就算同年代嘅朋友，大都係大陸落嚟，唔通佢哋又係蝗蟲？」
社區講座到大學通識課
自1949年中共建政，浪接浪的政治運動，造就一批批逃難南來的舊香港人，「六二年大逃亡潮，奉行抵壘政策，一入市區就可居留，個個屋企都梗有幾個咁嘅親戚，住得幾細都好，寧願打地鋪，一定收留。有啲的士司機，就算唔識，喺街度都會接你一程」。守望相助的年代，成了教科書上的傳說，只有他，對那些年的情與事很執着，就像傳教，由社區講座到大學通識課，四出講「見證」，樂此不倦，「做人，其實簡單啲比較開心」。
行年65，鄭寶鴻的人生，的確毫不複雜。一份工打足一世，一世人只住一個地區，你說他悶？他說他很快樂。「細個住伊利近街，小學畢業喺銀號做，間公司又喺附近，到自己出嚟開舖頭，都喺永吉街，對出就係蓮香樓」。12歲小學畢業，經親戚介紹入了中資銀號做練習生，由職員仔做到經理，買賣金銀股票，晚上讀夜校，拉扯完成中學，一份工做足33年。
「嗰時搵工唔難，尤其做工廠；做警察基本上識默寫幾十個字已經會請，銀行工最矜貴，無人做擔保基本上唔使諗」。五十年代最多童工，他笑言小學畢業已難能可貴，「考上官立小學，就好似中咗六合彩三獎咁難」。經歷過百廢待舉的五十年代，1967及1973年兩次大股災，紙上黃金又蒸發了，打回原形，45歲那年，儲了小筆錢，開了小店，由零開始，好歹也圓了老闆夢。
得港大圖書館館長賞識
「𠵱家好多人40歲就話退休，我嗰代人最怕手停口停，我做嘅中資公司55歲退休，嗰時諗如果自己做老闆，就唔使諗退休，做到80歲都得」。閒時投稿講講香港掌故趣聞已很滿足，但一次「奇遇」，卻令從無大野心的他，走進人生下半場，「港大打畀我，問我有無興趣申請張圖書證！」楊國雄是前港大圖書館館長，又是研究報業史的權威，原來，楊老看了他的文章，很欣賞。
「嗰時我寂寂無聞，有人留意受寵若驚，連續半個月喺圖書館坐到夜晚10點關門先走，攞住本開埠初期嘅憲報都睇到津津有味，又狂影舊報章同年鑑，如入寶山」。過去十年，他追回失去了的歲月，出版街道百年系統成了中學生教材，獲邀當天子門生的通識老師，游走於不同大學，「人生，就係估唔到先好玩」。走過他眼中最窮但也最好的年代，成就了無限可能，他笑得開懷。